Fréttastjórinn undrast niðurstöðuna

„Ég undrast mjög þessa niðurstöðu, en ég á eftir að kynna mér dóminn betur," segir Óðinn Jónsson, fréttastjóri RÚV, um hæstaréttardóm yfir Svavari Halldórssyni fréttamanni.

Svavar var dæmdur til að greiða Jóni Ásgeiri Jóhannessyni 300 þúsund krónur í miskabætur vegna fréttar sem hann skrifaði um Fons, félag Pálma Haraldssonar, en fréttin fjallaði um þriggja milljarða króna lán félagsins til huldufélagsins Pace Associates, sem skráð var í Panama og aðild Jóns Ásgeirs að málinu.

„Þetta er vægast sagt sérstök niðurstaða," segir Óðinn. Aðspurður segir hann að þessi niðurstaða muni ekki hafa nein áhrif á stöðu Svavars hjá RÚV. „Og við höfum staðið á bakvið hann í þessum málaferlum og hann mun ekki hljóta skaða af," segir Óðinn.