Séra Sigurði Helga ráðlagt að endurgreiða utanlandsferðina

Ríkisendurskoðandi segir að fyrrverandi forstjóri hjúkrunarheimilisins Eirar hafi viðhaft örlætisgjörning þegar hann gaf tengdasyni sínum gjafabréf fyrir utanlandsferð. Forstjóranum fyrrverandi er ráðlagt að endurgreiða upphæðina.

Eins og við sögðum frá í fréttum okkar í gær bendir ýmislegt til þess fjárhagserfiðleika og óráðsíu innan Eirar megi rekja mörg ár aftur í tímann, allt til forstjóratíðar séra Sigurðar Helga Guðmundssonar sem lét af störfum hjá Eir á síðasta ári.

Á meðal þess sem vakið hefur athygli er að forstjórinn lét Eir greiða 200 þúsund krónur fyrir flugfarseðla fyrir dóttur sína og fjölskyldu hennar í ágúst 2011 í formi gjafabréfs.

Svörin sem Sigurður Helgi hefur gefið fyrir þessu eru á þá leið að tengdasonur sinn hafi veitt hjúkrunarheimilinu lögfræðiaðstoð og að farseðlarnir hafi verið þóknun fyrir það.

Núverandi stjórn Eirar fór þess á leit við Ríkisendurskoðun að hún rannsakaði málið og í bréfi Ríkisendurskoðanda um málið segir að ekki hafi verið sýnt fram á það með neinum hætti að útgjöldin tengist Eir með nokkrum hætti. Ekkert liggi fyrir sem útskýri í hverju meint lögrfræðiþjónusta á að hafa verið fólgin.

Því verði að líta svo á að um svokallaðan örlætisgjörning að ræða af hálfu Sigurðar Helga, sem honum hafi verið óheimilt að standa fyrir án samþykkis stjórnar.

Í lok bréfsins leggur Ríkisendurskoðandi til að Sigurði Helga verði gefinn kostur á að ljúka málinu með því að endurgreiða upphæðina innan tiltekins frests. Að öðrum kosti verði nauðsynlegt að íhuga næstu skref í málinu, eins og það er orðað.

Ekkki náðist í Sigurð Helga við vinnslu fréttarinnar.