Glæsilegustu sæðingahrútar landsins í einu riti

Allt áhugafólk um íslensku sauðkindina brosir breitt þessa dagana því ný hrútaskrá var að koma úr prentun. Þar er hægt er að fá allar upplýsingar um bestu og flottustu hrúta landsins.

Síminn hjá Búnaðarsambandi Suðurlands á Selfossi hefur ekki stoppað síðustu daga, bændur og búalið eru að hringja til að vita hvort nýja Hrútaskráin sé komin út enda er þetta jólabókin í ár hjá sauðfjárbændum. Skráin var að koma úr prentun og ríkur út eins og heitar lummur.

„Það stoppar varla síminn eftir að skráin kom út," segir Guðmundur Jóhannesson, ritstjóri Hrútaskrárinnar. „Það eru allir að spyrja eftir henni. Hún er loksins komin út en hún hefur reyndar verið á netinu í um viku. En fólk vill og þreifa á henni."

Sp.bm. Af hverju er þetta svona vinsælt blað?

„Það er almennt áhugi á sauðfjárrækt. Hann hefur vaxið undanfarið og er mjög almennur. Áhugi meðal sauðfjárræktenda hefur aukist. Blaðið er mjög vinsælt."

Guðmundur segir að Hrútaskráin sé heitasta blaðið í dag enda lesið spjaldanna á milli á öllum alvöru sveitabæjum.

„Þetta eru lýsingar á hrútunum sjálfum og afkvæmum þeirra. Hvernig dætur þeirra eru lömbin sem undan þeim koma eru."

Sp.blm. Og þarna eru allir flottustu hrútar landsins?

„Þetta er rjóminn af hrútunum í landinu," segir Guðmundur.

En hvenær hefst formleg sæðistaka úr hrútunum og hvernig er sá tími á Sauðfjársæðingastöð Suðurlands?

„Sæðistaka með fersku sæði og dreifingu á því hefst 1. desember. Það er mikið fjör í jólamánuðinum.Sæðistaka byrjar yfirleitt fimm á morgnanna og fer strax út til bænda svo að menn eru byrjaðir að nota það klukkan tvö."