Hættulegt að bera út póstinn - þrír til fjórir slasast í hverjum mánuði

Það slasast þrennt til fernt póstburðarfólk Póstsins í hverjum mánuði við hefðbundin störf og eru frá vinnu í lengri eða skemmri tíma. Algengustu slysin eru að fólk hrasar og árásir hunda, en flest slysin verða þegar bréfberar eru komnir inn fyrir lóðarmörk samkvæmt tilkynningu frá Póstinum.

Af þessum ástæðum mun Pósturinn standa fyrir árlegri öryggisviku hjá Póstinum. Í öryggisvikunni taka starfsmenn þátt í að leita úrbóta á ferlum og starfsháttum til að tryggja að öryggi og aðbúnaður í starfsumhverfinu séu með sem bestum hætti. Að þessu sinni kallar Pósturinn einnig eftir aðstoð almennings til að huga að aðgengi fyrir bréfbera að húsnæði sínu, þar sem því miður flest slysin verða.

Fólk getur bætt aðgengi og öryggi bréfbera með því að:

Sjá til þess að aðkoma að hús sé greiðfær

Moka snjó og salta tröppur að vetrarlagi

Hafa útiljós kveikt í myrkri

Hafa hunda inni eða í bandi fjarri bréfalúgu eða póstkassa

Pósturinn hvetur almenning til að auka öryggi og bjóða bréfberann velkominn með góðu aðgengi og engum slysahættum.