Egill Skallagrímsson hefði kveikt í Landsbankanum

„Þetta er bara grín og glens, fyrst og fremst að draga fram skemmtilega hluti varðandi sögurnar. Finna hliðstæður og annað," segir Óttar Guðmundsson, geðlæknir, en hann hefur rýnt í lundafar Þjóðsagnahetjanna síðustu misseri.

Hann gerir geðslagi hetjanna skil í sýningu í Landsnámssetrinu í Borgarnesi. Óttar var gestur í útvarpsþættinum Reykjavík síðdegis á Bylgjunni í dag.

Óttar tekur Egil Skallagrímsson í nútíma sálgreiningu.

„Egill var mikill peningamaður, nískur og verður verulega sár þegar hann glatar peningum. Hann leggur allt í sölurnar til að fá það sem hann á skilið eða á skuldað."

„Hefði hann tapað fé í bankahruninu hefði hann líklega skundað í næsta banka og gert eitthvað verulega róttækt. Lamið einhvern eða jafnvel kveikt í Landsbankanum."

Óttar bendir á að Egill hafi verið séður í peningamálum. Hann hefði eflaust átt vildarmenn sem hefðu haft samband við hann og komið upplýsingum til hans fyrir hrun.

„Hann var svolítið eins og Jóakim Aðalönd, hann vissi af auðævum sínum og var bara sáttur með að eiga pening.“

Hægt er að hlusta á viðtalið í heild sinni hér fyrir ofan.