Segir Hönnu Birnu standa fyrir "einföld skilaboð fremur en djúpar rökræður"

Hanna Birna Kristjánsdóttir, sem sækist eftir fyrsta sætinu í prófkjöri Sjálfstæðisflokksins í Reykjavík, á "enga aðra erfiða fortíð í pólitík en að hafa skilið skuldavanda Orkuveitunnar eftir til úrlausnar fyrir Besta flokkinn“ og stendur fyrir "einföld skilaboð fremur en djúpar rökræður“ að mati Þorsteins Pálssonar, fyrrverandi formanns flokksins.

Þorsteinn fjallar um fyrirhugað prófkjör Sjálfstæðisflokksins í vikulegum pistli sínum í helgarblaði Fréttablaðsins. Þorsteinn segir Illuga Gunnarsson, sem einnig sækist eftir fyrsta sætinu, hafa „gert meir en aðrir þingmenn flokksins í því að brjóta mál til mergjar á hugmyndafræðilegum grundvelli í greinum og fyrirlestrum, hvort heldur er á sviði menntunar eða efnahagsstjórnunar."

Þorsteinn segir að Hanna Birna sé algjör andstæða, sem standi „fyrir einföld skilaboð fremur en djúpar rökræður."

Á enga erfiða fortíð í stjórnmálum

Þetta verður að teljast býsna beitt gagnrýni á frambjóðandann en fréttastofa hefur ítrekað reynt að ná tali af Hönnu Birnu í dag til að fá viðbrögð við greininni. Ekki hefur náðst í hana og þá hefur hún ekki svarað SMS-skilaboðum fréttamanns.

Þorsteinn vitnar í Silfur Egils og það mat manna að Hanna Birna standi best að vígi fyrir prófkjörið hjá sjálfstæðismönnum í Reykjavík. „Hún á til að mynda enga aðra erfiða fortíð í pólitík en að hafa skilið skuldavanda Orkuveitunnar eftir til úrlausnar fyrir Besta flokkinn," segir Þorsteinn.

Einföld skilaboð að virka

„Einföld skilaboð" Hönnu Birnu virðast vera að virka því hún hefur mælst með yfirburðastuðning í skoðanakönnunum.

Hún fékk til dæmis 76,2% stuðning meðal sjálfstæðismanna í fyrsta sætið í nýlegri könnun Viðskiptablaðsins. Í þessu samhengi má einnig velta fyrir sér hvort þorri kjósenda kæri sig yfirleitt um annað en einföld skilaboð og skýra stefnu, en e.t.v er fyrrverandi formaðurinn að kalla eftir stefnunni með ummælum sínum.

Hanna Birna tillkynnti um ákvörðun sína 14. september sl. Í viðtali við fréttastofu sagði hún þá aðspurð, hvers vegna hún væri að bjóða sig fram: „Ég tel að stærstu verkefnin framundan í íslensku samfélagi séu að tryggja tækifæri sem flestra. Mig langar að leggja mitt af mörkum þar og ég tel að ég geti orðið að liði. Mig langar að innleiða breytingar í stjórnmálin. Ég hef staðið fyrir það í borgarstjórn og ég mun áfram gera það," sagði hún þá.

Hún sagði að helsta baráttumál sitt væru bætt vinnubrögð í stjórnmálum. thorbjorn@stod2.is