Krafðist þess að kjörfundur yrði framlengdur til miðnættis

Sigurður G. Guðjónsson hæstaréttarlögmaður hefur farið þess á leit að ákvörðun kjörstjórnar Samfylkingarinnar í Reykjavík um að synja sjötíu manns aðgangi að kjörskrá verði fellt úr gildi. Kjörfundur verði svo framlengdur til miðnættis. Sigurður sendi bréf með þessari kröfu til úrskurðarnefndar um kærumál í dag, en hún starfar samkvæmt reglum Samfylkingarinnar.

Forsaga málsins er sú að kjörstjórn hafnaði því að 350 manns á vegum Rósarinnar, yrðu á kjörskrá. Sigurður segir að samkvæmt reglum Samfylkingarinnar geti þeir kært sig aftur inn á kjörskrá ef þeir eru teknir af henni, eins og gerðist í þessu tilfelli. Umræddir 70 aðilar hafi allir gert það. Þeirri kröfu var hafnað í dag og barst Sigurði niðurstaðan rétt fyrir klukkan sex. Hann sendi því erindi til úrskurðarnefndarinnar.

„Hér með fer ég þess á leit fyrir hönd Rósarinnar og þeirra félagsmanna í félaginu sem lögðu fram kjörskrárkæru til kjörstjórnar Samfylkingarinnar sbr. m.a. tölvupósta og bréf að ákvörðun kjörstjórnar um að taka þessa aðila ekki upp á kjörskrá verði felld úr gildi og lagt verði fyrir kjörstjórn að framlengja kjörfund til miðnættis 17. nóvember 2012," segir í bréfinu sem sent var úrskurðarnefndinni.

Þess má geta að kjörfundi er lokið og verið er að telja atkvæði.