Forsetafrúin opnaði Íslenskuþorpið

Íslenskuþorpið, nýstárleg leið fyrir fólk sem er að læra íslensku sem annað mál, var formlega opnað á Háskólatorgi á föstudag. Það var frú Dorrit Moussaieff sem opnaði þorpið.

Hugmyndin að baki Íslenskuþorpinu byggist á rannsóknum dr. Guðrúnar Theodórsdóttur, lektors í annarsmálsfræðum við Íslensku- og menningardeild Háskóla Íslands. Nýjustu rannsóknir sýna að málnotkun er forsenda þess að fólk tileinki sér tungumál og að notkun málsins á fyrstu stigum getur flýtt fyrir frekara námi. Mikið átak þarf til að byrja að tala nýtt tungumál utan kennslustofunnar.

Nemendur í íslensku sem öðru máli nota nýja tungumálið nánast eingöngu í kennslustundum fyrsta árið í náminu. Þeim reynist erfitt að finna hentuga staði utan kennslustofunnar til að nota málið úti í samfélaginu því þeim er gjarnan svarað á ensku. Með Íslenskuþorpinu er brugðist við þessu og jafnframt skapast með því dýrmæt tækifæri til frekari rannsókna á sviði annarsmálsfræða.

Nánar um íslenskuþorpið hér.