Facebook og Twitter hefta þroska barna

Þráhyggja og skortur á sjálfsstjórn eru fylgifiskar mikillar notkunar á samskiptamiðlum á borð við Facebook og Twitter. Einna helst eru það börn sem eiga í hættu á að verða fyrir langvarandi áhrifum samfélagsmiðla.

Þetta segir Susan Greenfield, prófessor við Oxford-háskólann í Bretlandi. Greenfield er taugavísindamaður og með bakgrunn í lyfjafræði.

Það er breski fréttamiðillinn Telegraph sem greinir frá þessu.

Greenfield segir að kynni barna af netheimum geti haft langvarandi áhrif á persónuleika þeirra. Þannig er hætta á að börn þrói með sér áráttu- og þráhyggjuröskun og eigi í kjölfarið erfitt með að aðlagast samfélaginu.

Enn fremur telur Greenfield að dauðhreinsað umhverfi samfélagsmiðla geti ýtt undir sjálfsaðdáun og skort á samúð.

Hún bendir á að nýlegar tölur sýni að rúmlega helmingur barna á aldrinum 13 til 17 ára eyði um og yfir þrjátíu klukkustundum á viku fyrir framan tölvuskjá — sama hvort það sé tölvan, lesbretti eða snjallsímar.