Garnett hættur að tala við Allen

Þeir Ray Allen og Kevin Garnett voru liðsfélagar hjá Boston Celtics frá 2007 til 2012 en nú er Allen farinn til Miami. Vinskap þeirra er þar með lokið og Garnett vill ekkert hafa með sinn gamla félaga.

"Ég er ekki einu sinni með símanúmerið hans lengur. Ég er bara heiðarlegur með þetta. Svona er staðan bara," sagði Garnett sem vildi ekki tjá sig um ástæður þess að hann vildi ekki vera vinur Allen lengur.

"Ég hef tekið þá ákvörðun að tjá mig ekkert um það. Ég tók þessa ákvörðun sjálfur. Ég er náinn Ray og þekki fjölskyldu hans og óska henni alls hins besta. Þetta er bara ákvörðun sem ég tók."

Garnett ku hafa tekið því mjög illa er Allen ákvað að færa sig yfir til Miami en sjálfur neitar Garnett þeim fréttum.