"SÁÁ hefur snert hverja einustu fjölskyldu í landinu“

Tæplega eitt þúsund manns mættu á 35 ára afmæli SÁÁ í Háskólabíói í dag. Ólafur Ragnar Grímsson, forseti Íslands, ávarpaði fundinn ásamt Jóni Gnarr, borgarstjóra. Fundurinn samþykkti ályktun þar sem skorað er á íslensku þjóðina að skrifa undir frumvarp um betra líf fyrir þolendur áfengis- og vímuefnavandans.

Dagskráin í Háskólabíói í dag var fjölbreytt. KK, Ellen Kristjáns, Valdimar, Jónas Sig og Kristjana Stefánsdóttir sungu við undirleik hljómsveitarinnar Buffs og fjölmargir heiðruðu samtökin með ávörpum. Hannes og Smári, leiknir af Halldóru Geirharðs og Ólafíu Hrönn slógu síðan í gegn hjá gestum.

Gunnar Smári Egilsson, formaður SÁÁ, sló síðan botninn í hátíðarhöldin þegar hann hvatti alla til dáða og til að halda áfram að vinna saman að Betra lífi.

„Fólkið í landinu er fyrir löngu búið að átta sig á því hvað SÁÁ stendur fyrir. SÁÁ hefur snert hverja einustu fjölskyldu í landinu," sagði Gunnar Smári í dag. „Það byggir á traustum grunni sem frumkvöðlarnir mótuðu á tímum þegar engin úrræði voru til fyrir veika alkóhólista. Það tókst að byggja upp SÁÁ eins og það er í dag, það tókst að byggja hér upp faglega meðferð á þessum grunni, að við ættum sama rétt á heilbrigðisþjónustu og aðrir sjúklingar á þessu landi."

Betra líf er átak sem SÁÁ hóf á fimmtudaginn en um 3500 manns hafa nú tekið í því. Tilgangur átaksins er að þjóðin leggi fram frumvarp sem á að hjálpa þeim sem enn eru hjálpar þurfi af völdum áfengissýki.

„Baráttufundur SÁÁ - haldinn í Háskólabíói 6. október 2012 í tilefni af 35 ára afmæli samtakanna - skorar á íslensku þjóðina að skrifa undir frumvarp um betra líf fyrir þolendur áfengis- og vímuefnavandans. Fundurinn hvetur þjóðina til að taka undir þá réttlátu kröfu að hluti þess áfengisgjalds, sem áfengissjúklingar greiða, verði notaður til að hjálpa þeim til betra lífs."