Einar Haukur er sáttur við sumarið | stórt próf bíður hans í Svíþjóð

"Þetta var kannski gott fyrir mig að fara þrívegis í bráðabana um sigurinn,“ sagði Einar Haukur Óskarsson afrekskylfingur úr Keili eftir sigurinn á Símamótinu í Grafarholti í gær. Þetta er fyrsti sigur Einars á Eimskipsmótaröðinni í sumar en hann hefur einu sinni áður sigrað á Eimskipsmótaröðinni. Einar Haukur stefnir á að komast í atvinnumennsku í haust en hann endaði í fjórða sæti stigalista Eimskipsmótaraðarinnar. Einar og Kristján Þór Einarsson úr Keili voru jafnir á þremur höggum yfir pari í efsta sæti eftir 54 holur og þeir fóru því á 18. braut til þess að gera út um hvor stæði uppi sem sigurvegari. Þeir léku báðir á pari eða 4 höggum í fyrstu tilraun, það sama gerðist í annarri tilraun þar sem að Einar Haukur var í kjörstöðu til þess að fá fugl og tryggja sér sigurinn. Úrslitin réðust í þriðju tilraun þar sem að Kristján Þór sló innáhöggið í glompu hægra meginn við flötina og hann fékk skolla (+1) á meðan Einar fékk par og fagnaði hann þar með sigri.. "Ég er bara mjög sáttur við sumar. Ég fór í miklar sveiflubreytingar með Sigga Palla 8 Sigurpáll Geir Sveinsson) og Bjögga (Björgvin Sigurbergsson). Ég var að spila mjög illa til að byrja með en ég hef verið að slá þessar breytingar inn og þetta er allt að koma. Ég náði mínum takmörkum í sumar og er bjartsýnn á framhaldið.“ Einar Haukur mun á næstu dögum halda til Svíþjóðar þar sem hann ætlar að reyna að komast inn á sterka atvinnumótaröð, Nordea-mótaröðina. "Ég fer á næstunni til Gautaborgar í Svíþjóð þar sem ég ætla að reyna við úrtökumótið á Nordea mótaröðinni. Það er mjög spennandi. Þetta er eitt úrtökumót, þar sem leiknar verða 54 holur og keppendum er fækkað eftir 36 holur. Það eru margir sem eru berjast um þessi sæti sem eru í boði á mótaröðinni. Ég ákvað fara frekar þessa leið, í gegnum mótaröðina í Svíþjóð og ef vel gengur þá gefur það möguleika á að komast inn á áskorendamótaröðina og þar á eftir sjálfa Evrópumótaröðina,“ sagði Einar Haukur Óskarsson.