Kristján og Tinna halda forystunni á Símamótinu

Keilisfólkið Kristján Þór Einarsson og Tinna Jóhannsdóttir eru áfram efst eftir tvo hringi á Síma mótinu í golfi sem fer fram á Grafarholtsvelli og er lokamót sumarsins á Eimskipsmótaröðinni. Bæði voru þau Kristján og Tinna með forustu eftir fyrstu 18 holurnar en alls voru spilaðar 36 holur í dag. Síðasti hringurinn fer síðan fram á morgun.

Kristján Þór Einarsson lék tvo fyrstu hringina á 144 höggum eða tveimur höggum yfir pari. Hann er með tveggja högga forskot á Hlyn Geir Hjartarson úr GOS sem er í öðru sætinu. Þrír eru svo jafnir í 3. til 5. sæti en það eru þeir Magnús Lárusson, Einar Haukur Óskarsson og Fannar Ingi Steingrímsson.

Hlynur Geir er í góðri stöðu til að tryggja sér stigameistaratitilinn þar sem að Haraldur Franklín Magnús úr GR, tvöfaldur Íslandsmeistari á þessu tímabili og efsti maður á stigalista karla keppir ekki á lokamótinu. Hlynur var í 2. sæti á stigalistanum og fær mesta samkeppnina frá þeim Þórði Rafni Gissurarsyni úr GR og Rúnari Arnórssyni úr GK í baráttunni um stigameistaratitilinn.

Bjarki Pétursson úr GB lék best á öðrum hring en hann lék á 69 höggum eða tveimur höggum undir pari. Hann bætti sig um tíu högg frá því á fyrsta hring og lyfti sér upp í 5.-6. sæti. Aðstæður voru erfiðar í dag en talsverð rigning gerði kylfingum erfitt fyrir. Lokahringurinn fer fram á morgun.

Tinna Jóhannsdóttir úr Keili er í vænlegri stöðu fyrir lokahringinn. Tinna er samtals á 150 höggum í dag eða átta höggum yfir pari eftir 36 holur sem leiknar voru í dag. Tinna lék fyrri hring dagsins á 76 höggum og síðari hringinn á 74 höggum.

Ragnhildur Kristinsdóttir úr GR er í öðru sæti á samtals 155 höggum eftir að hafa leikið á 80 og 75 höggum í dag. Signý Arnórsdóttir úr Keili er í þriðja sæti á 156 höggum og Guðrún Brá Björgvinsdóttir úr Keili í fjórða sæti á 157 höggum.

Staða efstu kylfinga í karlaflokki:

1. Kristján Þór Einarsson, GK 69-75=144 +2

2. Hlynur Geir Hjartarson, GOS 75-71=146 +4

3.-4. Magnús Lárusson, GKJ 72-75=147 +5

3.-4. Einar Haukur Óskarsson, GK 71-76=147 +5

5.-6. Þórður Rafn Gissurarson, GR 73-75=148 +6

5.-6. Bjarki Pétursson, GB 79-69=148 +6

7. Kjartan Dór Kjartansson, GKG 75-74=149 +7

8. Fannar Ingi Steingrímsson, GHG 76-74=150 +8

9.-11. Andri Már Óskarsson, GHR 78-74=152 +10

9.-11. Alfreð Brynjar Kristinsson, GKG 78-74=152 +10

9.-11. Birgir Guðjónsson, GR 80-72=152 +10



Staða efstu kylfinga í kvennaflokki:

1. Tinna Jóhannsdóttir, GK 76-74=150 +8

2. Ragnhildur Kristinsdóttir, GR 80-75=155 +13

3. Signý Arnórsdóttir, GK 79-77=156 +14

4. Guðrún Brá Björgvinsdóttir, GK 77-80=157 +15

5. Karen Guðnadóttir, GS 82-77=159 +17

6. Guðrún Pétursdóttir, GR 80-82=162 +20

7.-9. Heiða Guðnadóttir, GKJ 84-86=170 +28

7.-9. Hansína Þorkelsdóttir, GKG 82-88=170 +28

7.-9.Sara Margrét Hinriksdóttir, GK 85-85=170 +28

10.-11. Ingunn Einarsdóttir, GKG 90-82=172 +30

10.-11. Hildur Rún Guðjónsdóttir, GK 85-87=172 +30