Aðalmeðferð í máli Gunnlaugs gegn Teiti hafin

Aðalmeðferð í meiðyrðamáli Gunnlaugs M. Sigmundssonar og eiginkonu hans, Sigríðar G. Sigurbjörnsdóttur gegn bloggaranum Teiti Atlasyni hófst nú klukkan níu í Héraðsdómi Reykjavíkur.

Hjónin höfðuðu mál gegn Teiti vegna upprifjunar hans á Kögunarmálinu svokallaða sem hann birti á bloggi sínu á dv.is á síðasta ári. Teitur hefur síðan reglulega bloggað um gang málaferlanna en málið tók sérkennilega stefnu skömmu fyrir jól á síðasta ári þegar í ljós kom að Gunnlaugur hafði sent Teiti nafnlaus smáskilaboð með ógeðfelldum skilaboðum. Gunnlaugur baðst síðar afsökunar á þeim í Fréttablaðinu en neitaði að hafa þau eftir í grein sem hann birti í blaðinu.

Lögmaður Teits bað þá Gunnlaug, sem er faðir Sigmundar Davíðs, formanns Framsóknarflokksins, um að draga málsóknina til baka, sem hann neitaði að gera.

Teitur aftur á móti óttast að málskostnaðurinn muni sliga sig.