Mikael Torfason ritstýrir Fréttatímanum

„Þetta leggst bara mjög vel í mig. Það eru fimm ár síðan ég starfaði síðast við fjölmiðla, þannig ég kem til baka núna í þvílíku formi og mjög sáttur," segir Mikael Torfason, sem hefur verið ráðinn annar tveggja ritstjóra Fréttatímans. Hann sest við hlið Jónasar Haraldssonar, sem ritstýrir blaðinu nú.

„Það er rosalega skrítið að vera svona lengi í burtu frá fjölmiðlum. Það er alveg nauðsynlegt að koma ferskur að þessu og síðustu ár hef ég nýtt tímann vel. Ég hef meira að segja tekið heilu árin þar sem ég hef alveg sleppt því að lesa og horfa á fréttir, bara til þess að vera ferskur þegar ég byrjaði á ný," segir Mikael.

Honum líst vel á komandi tíma, þar sem helgarblöð henti sér mjög vel. „Þegar ég var tuttugu og þriggja ára þá ritstýrði ég blaði sem minnir svolítið á Fréttatímann. Það var blaðið Fókus sem kom út vikulega. Þar gerðum við mannlegar fréttir og tókum góð viðtöl. Ég hef mikinn áhuga á því," segir hann.

Spurður hvort að lesendur megi búast við því að Fréttatíminn færist í svipaða átt og DV var þegar hann ritstýrði því blaði á sínum tíma, segir Mikael að svo sé ekki. Blaðið verði þó ekki eins og Gestgjafinn eða í þá áttina. „Fréttatíminn er mjög gott blað, og að mínu mati besta tímaritið sem gefið er út á landinu í dag," segir hann að lokum.