Of fáir notuðu nemakort Strætó

Nú þegar skólastarf á landinu er að hefjast reka framhalds- og háskólanemar sig á að verð á nemakortum í strætó hefur nánast tvöfaldast frá því í fyrra. Einar Örn Benediktsson, stjórnarmaður Strætó og borgarfulltrúi Besta flokksins, segir að ákvörðunin hafi verið nauðsynleg þar sem of fáir nemendur notuðu kortið.

Kortin kostuðu í fyrra 20 þúsund krónur og giltu í 9 mánuði. Nú kosta þau 38.500 og gilda í heilt ár.

„Árið 2007 ákváðu sveitarfélögin á höfuðborgarsvæðinu að leggja í ákveðið tilraunaverkefni til að fá ungt fólk til að skilja einkabílinn meira eftir heima og nota strætó. Áætlunin var að fá 14 þúsund manns til að nota kortin en það voru ekki nema 7 þúsund sem gerðu það. Nú þykir verkefnið hafa mistekist og sveitarfélögin hafa dregið sig út úr því að einhverju eða öllu leyti," segir Reynir Jónsson, framkvæmdastjóri Strætó.

Þar að auki barst álit frá umboðsmanni barna á síðasta ári þar sem bent var á að mismunun milli barna fælist í því að gera háskóla- og framhaldsnemum kleift að kaupa nemakort meðan grunnskólabörn þyrftu að borga meira fyrir sín kort.

„Út af þessu urðum við að hækka gjöldin þó það væri fúlt," segir Einar. Hjá Strætó er markvisst stefnt að því að auka hlut farþega í fargjöldunum. Nú standa farþegar undir um það bil 25% af kostnaðarverði þjónustunnar miðað við 40-50% í öðrum löndum. Þessi hækkun er þáttur í umræddri stefnu, segir Reynir.

Einar bendir á þær jákvæðu fréttir að með vetraráætlun strætó sé tíðni ferða strætó aukin og vagnarnir aki lengur á kvöldin. Tíðni ferða strætó var skorin niður fyrir nokkrum misserum auk þess sem þeir hættu að ganga fyrri á kvöldin og byrjuðu seinna á morgnanna. Þetta vakti á sínum tíma óánægju hjá ýmsum starfsmönnum sem gátu fyrir vikið ekki nýtt sér vagnana til að fara til vinnu.

„Nú er þessi þróun að ganga til baka, vagnarnir byrjaðir að ganga lengur og við stefnum að því að auka tíðnina enn meira á næsta ári," segir Einar.