Breiður af kóral við Ísland

Í neðansjávarmyndatökuleiðangri Hafrannsóknastofnunar fundust ýmsar tegundir af sjaldgæfum kórölum og margs konar dýrategundir við Ísland. Sumar lífverurnar hafa sjaldan eða aldrei verið myndaðar hér við land áður.

Meðal annars náðust myndir af sérkennilegu dýri sem er gormlaga og stingst upp úr setinu. Ekki er hægt að greina með fullri vissu hvaða dýr þetta er, en líkur eru á að þetta sé ákveðin kóraltegund sem ekki hefur verið skráð áður hér við land.

Lífríki við kóralbreiður er afar fjölbreytt og talið að fiskar nýti sér þau sem skjól, en kóralrif eru afar hentugir felustaðir, og einnig er mikið fæðuframboð við þessi svæði. Hér við land hafa nokkur svæði, þar sem þessir kóralar eru í miklu magni, verið friðuð þar sem þeir eru afar viðkvæmir fyrir raski eins og af völdum veiðarfæra.

Leiðangurinn var liður í verkefni um kortlagningu á hafsbotninum til að skilgreina hvaða botntegundir er að finna hér við land.