Besta túlkunin á mannréttindum í ljósmynd

Friðrik Halldór Kristjánsson, þroskaþjálfi, hlaut fyrstu verðalun í ljósmyndasamkeppni mannréttindaskrifstofu Reykjavíkurborgar sem haldin var til að vekja athygli á mannréttindum almennt og mikilvægi þess að borgarbúum sé ekki mismunað. Myndin nefnist Það þurfa ekki allir að vera eins og sést hér til hliðar.

Friðrik er áhugamaður um ljósmyndun og tók myndina af konu sem hann vinnur með og barni vinar síns. Tilefnið var á sínum tíma ekki að senda hana inn í keppni. „Þetta var bara alger tilviljun. Ég tók hana bara til gamans en svo átti hún svo vel við í þessari keppni," segir Friðrik. „Mér finnst bara að þessi mynd segja þúsund orð. Rosa falleg og ljúf og sýnir okkur að það þurfa ekki allir að vera eins"

Myndin sýnir á einfaldan en einlægan hátt að þrátt fyrir að við séum öll mismunandi þá eigum við rétt á að njóta sömu mannréttinda. Mannréttindaskrifstofa Reykjavíkurborgar mun nota myndina á veggspjald til að kynna mannréttindi og mannréttindastefnu borgarinnar. Friðrik hlaut 150 þúsund í verðlaun.

Alls bárust 53 myndir í keppnina og nú stendur yfir sýning í Ráðhúsi Reykjavíkur á bestu myndunum.