Konur brugðust við auglýsingu eftir gjafaeggi

Í kjölfar þess að par auglýsti á netinu eftir gjafaeggi til að stytta biðina eftir tæknifrjóvgun höfðu konur samband við ArtMedica og lýstu sig tilbúnar að gefa egg til að greiða götu parsins. Auglýsingin bar því árangur og parið er komið með gjafa samkvæmt upplýsingum frá ArtMedica.

Ekki er mikið um að fólk taki málin í sínar hendur með þessum hætti, en ef það ber árangur þá fær viðkomandi par að skjótast fram fyrir röð og kemst strax í aðgerðina, rétt eins og þegar skyldmenni gefur egg.

Bið eftir tæknifrjóvgun er um eitt og hálft ár en ástæðan er takmarkaður fjöldi gjafaeggja. Samkvæmt upplýsingum frá ArtMedica er biðin nú um mundir ekki óvenjulöng heldur hefur verið svipuð síðustu ár.

Sérfræðingar hjá ArtMedica skipta sér lítið af svona uppátækjum fólks og hafa enga sérstaka skoðun á þeim. Þeir vilja þó tæplega að sjálfsbjargarviðleitni af þessum toga aukist til muna enda yrði erfitt að halda utan um það.