Tekjur af íslenska hestinum nema milljörðum króna árlega

Ætla má að beinar tekjur Íslendinga af íslenska hestinum séu að minnsta kosti 2,5 milljarðar króna á ársgrundvelli. Þá eru ekki meðtaldar tekjur vegna landsmóts hestamanna sem haldið er annað hvert ár. Þetta kemur fram í svari Steingríms J. Sigfússonar, sjávarútvegs- og landbúnaðarráðherra, við fyrirspurn Guðrúnar H. Valdimarsdóttur um gjaldeyristekjur af íslenska hestinum.

Í svari ráðherra er vísað til skýrslu nefndar sem skipuð var í febrúar 2008 af þáverandi sjávarútvegs- og landbúnaðarráðherra, þar sem kemur fram að tekjur af íslenska hestinum vegna lífhrossasölu úr landi nema um 1 milljarði króna árlega, tekjur af útflutningi hrossakjöts eru rétt um 100 milljónir á ári og tekjur hestaleiga í landinu eru um 1 til 1,5 milljarður króna árlega, aðallega af erlendum ferðamönnum. Talið er að um 90 þúsund ferðamenn fari á hestbak á ári hverju til jafnaðar.

Erlendir gestir á landsmótum hestamanna hlaupa á þúsundum. Þannig er talið að þeir hafi verið um 3.000 á landsmótinu á Hellu 2008. Þeir voru töluvert færri á landsmótinu á Vindheimamelum í fyrra, enda var það mót haldið við óvenjulegar aðstæður en fyrir liggur að mikill fjöldi erlendra gesta sótti landsmótið í Reykjavík í ár eða um 3.500 manns.