Hryllingsmyndameistari heiðursgestur á RIFF

Ítalski kvikmyndagerðarmaðurinn Dario Argento verður heiðursgestur RIFF árið 2012. Kvikmyndahátíðin hefst 27. september næstkomandi og verður úrval mynda Argentos á dagskrá. Þá mun hann einnig ávarpa gesti hátíðarinnar.

Kvikmyndir Dario Argento þekkja vafalaust margir. Hann er einn þekktasti kvikmyndagerðarmaður Ítala en kvikmyndir á borð við Suspiria (1977), Once Upon a time in the West (1968, handrit), Deep Red (1975) og The Bird with the Crystal Plumage (1970) hafa vakið mikla athygli.

Yfirnáttúruleg umfjöllunarefni einkenna kvikmyndir Argentos en kvikmyndin Suspiria þykir ein magnaðasta hryllingsmynd allra tíma.

Argento hefur haldið kvikmyndagerð áfram síðustu árin og verið duglegur við að taka nýja tækni upp á sína arma. Þannig var hann einn sá fyrsti til að nota fjaðurstoð-tæknina (e. steadicam) í mynd sinni Phenomena (1985) og í nýjustu mynd hans, Dracula 3D (2012), er þrívíddartæknin í fyrirrúmi.

Hægt er að nálgast allar upplýsingar um RIFF hér.