Púuðu á skólameistarann - busun lögð af á Suðurlandi

Eldri nemendur fjölbrautaskóla Suðurland púuðu á skólameistara sinn, Olgu Lísu Garðarsdóttur, þegar hún setti formlega skólastarf í morgun. Hún naut aftur á móti stuðnings yngri nemanda sem klöppuðu fyrir ræðu hennar.

Samkvæmt sunnlenska fréttavefnum dfs þá tilkynnti skólastýran að busavígslur nýnema yrðu nú lagðar niður í skólanum. Í staðinn verða haldnir tónleikar til þess að bjóða nýnemana velkomna í skólann.

Eldri nemendum leist illa á hugmyndina og mótmæltu með því að púa en nýnemarnir klöppuðu lifandis fegnir um að sleppa undan refsingum eldri nemanna.

Við setninguna var einnig skrifað undir nýja styrktarsamninga vegna íþróttaakademíanna í skólanum en fjórar slíkar eru starfræktar, eða í fimleikum, handbolta, knattspyrnu og körfubolta. Þá er hestabraut við skólann. Að lokinni skólasetningu hófst kennsla samkvæmt stundaskrá.

Um 1040 nemendur eru skráðir í skólann, 51 % strákar og 49% stelpur.