Ráðherrakapallinn lagður á morgun

Jóhanna Sigurðardóttir kynnir í fyrramálið tillögur sínar að nýrri ráðherraskipan í ríkisstjórn. Líklegast þykir að Katrín Júlíusdóttir snúi aftur í ráðherrastól.

Um mánaðarmótin taka gildi breytingar á ráðuneytunum þannig að þeim mun fækka í átta. Nýtt atvinnuvega- og nýsköpunarráðuneyti mun taka til starfa, iðnaðarráðuneytið verður aflagt og Umhverfisráðuneytið mun hér eftir heita umhverfis- og auðlindaráðuneyti.

Þá verður til ráðuneyti fjármála- og efnahags, en verkefni efnahags- og viðskiptaráðuneytisins færast til fjármálaráðuneytisins annars vegar og atvinnuvegaráðuneytisins hins vegar.

Á sama tíma mun Katrín Júlíusdóttir snúa aftur úr barneignaleyfi en hún var iðnaðarráðherra áður en hún fór í leyfi. Við því embætti tók Oddný G. Harðardóttir en hún færðist síðar yfir í fjármálaráðuneytið.

Um áramótin var ekki annað að skilja á Oddnýju en að hún liti svo á að hún væri að verma sætið fyrir Katrínu:„Það er bara þannig að þegar einhvern fer í barneignarleyfi, þá kemur einhvern annar tímabundið í staðinn."

En átta mánuðir eru langur tími í pólitík og því ekki endilega loku fyrir það skotið að Oddný sitji áfram í embætti. Þrjár útfærslur þykja því líklegastar:

Sú fyrsta, og jafnframt kannski sú ólíklegasta, er að engar breytingar verði gerðar. Oddný verði áfram fjármálaráðherra og Katrín óbreyttur þingmaður.

Önnur útfærslan er á þá leið að Oddný hverfi á braut og Katrín taki við fjármálaráðuneytinu.

Þriðji möguleikinn sem margir telja líklegastan, er sá að Katrín taki við velferðarráðuneytinu af Guðbjarti Hannessyni sem verði fjármálaráðherra, og að Oddný hverfi á braut. Þetta er rökstutt á þann veg að Guðbjartur hafi mikla reynslu, hafandi verið fremur farsæll formaður fjárlaganefndar.

Eins og fyrr sagði eru þetta aðeins vangaveltur, forsætisráðherra hefur farið afar hljótt með áform sín og lítið látið uppi. Á morgun heldur Samfylkingin flokksstjórnarfund sinn og þar mun Jóhanna kynna tillögur sínar um ráðherraskipan. Fyrst verða þingmönnum kynntar tillögurnar á fundi sem hefst klukkan hálf níu.

Það skýrist því í fyrramálið hvernig þessi ráðherrakapall mun á endanum leggjast sig.