Stjórnendur Iceland Foods ekki spenntir fyrir eignastýringarsjóðum

Lykilstjórnendur Iceland Foods hafa ekki áhuga á að vinna hjá fyrirtækinu verði það í eigu eignastýringarsjóða en tveir slíkir skiluðu inn bindandi tilboðum í hlut slitastjórna Landsbankans og Glitnis í Iceland. Malcolm Walker, forstjóri Iceland, tengist hvorugum sjóðnum.

Annarri umferð söluferlisins á Iceland Foods lauk mánudagskvöldið í síðustu viku en þá skiluðu tveir eignastýringarsjóðir, Bain Capital og BC Capital, inn bindandi skilyrtum tilboðum í 67 prósenta hlut slitastjórnar Landsbankans og 10 prósenta hlut slitastjórnar Glitnis í fyrirtækinu. Eftir því sem fréttastofa kemst miðast fjárhæð tilboðanna við að 100 prósent hlutafjár í fyrirtækinu séu 1,4 milljarða punda virði, jafnvirði rúmlega 260 milljarða króna. Fréttastofan hefur heimildir fyrir því að bæði tilboðin séu mjög skilyrt og háð ákveðnum forsendum um árangur.

Malcolm Walker, forstjóri Iceland Foods, á 23 prósenta hlut í fyrirtækinu ásamt fjórum öðrum lykilstjórnendum, m.a fjármálastjóranum Tarsem Dhaliwal, en þeir koma að hvorugu tilboðinu. Hlutur Dhaliwals er 5,5 prósent, en hann hefur lýst því yfir að stjórnendurnir vilji helst kaupa fyrirtækið sjálfir en að vinna með öðrum fjárfestum.

Samkvæmt upplýsingum fréttastofu hugnast stjórnendum Iceland Foods ekki að starfa með eignastýringarsjóðum verði þeir með meirihluta í fyrirtækinu. Það þýðir að fari svo að slitastjórnir bankanna ákveði að selja öðrum hvorum sjóðnum, Bain Capital eða BC Capital, er ekki útilokað að Walker og félagar selji sín bréf samtímis og hætti hjá fyrirtækinu. Walker gerði sjálfur tilboð í Iceland Foods í fyrra sem hljóðaði upp á 1 milljarð punda fyrir 100 prósent hlutafjár. Frá því hefur verið greint áður, m.a í Financial Times, að Walker sé ekki spenntur fyrir því að greiða mikið hærra verð fyrir fyrirtækið.

Nefndir „skrímslasjóðir"

Eignastýringarsjóðir (e. private equity funds) sambærilegir BC Capital og Bain, stundum nefndir framtakssjóðir, hafa legið undir mikilli gagnrýni í fjölmiðlum að undanförnu fyrir að gera óeðlilegar arðsemiskröfur, skera fyrirtæki niður og fækka starfsmönnum. Í síðustu viku var umfjöllun um slíka sjóði í leiðara Economist undir fyrisögninni „Monsters Inc." Margir frmtakssjóðir af þessu tagi státa sig af því að búa til arðsemi fyrir eigendur sína með því að taka yfir fyrirtæki, bæta rekstur þeirra, og selja þau svo áfram. Ekki er útilokað að stjórnendur Iceland Foods hafi einmitt áhyggjur af þessu og vilji því ekki taka þátt í rekstri fyrirtækisins áfram með slíka eigendur.

Walker hefur til þessa ekki skilað inn tilboði, en eins og komið hefur fram er hann með forkaupsrétt í hlut slitastjórnar Landsbankans í Iceland Foods og hefur hann 42 daga til að jafna tilboð sem berst í hlutinn eftir samþykki tilboðs. Þessi frestur byrjar að líða frá þeim degi er samþykki slitastjórnar liggur fyrir. Hann getur því í raun farið sér hægt í bili.

Salan á Iceland Foods á erindi við allan almenning. Um er að ræða stærstu einstöku eign þrotabús Landsbankans, peninga sem eiga að fara upp í forgangskröfur vegna Icesave-reikninganna.

Páll Benediktsson, talsmaður slitastjórnar Landsbankans, sagði að á meðan væri verið að fara yfir tilboðin í Iceland Foods myndi slitastjórn bankans ekki tjá sig. Hann sagði ómögulegt að svara því hvenær þessu myndi ljúka, en sagðist reikna með að það tæki nokkrar vikur í að fara yfir þau tilboð sem bárust. Að loknum samtölum við fulltrúa eignastýringarsjóðanna tveggja, BC Capital og Bain, mun slitastjórnin meta hvort hún telji ástæðu til að hefja formlegar samningaviðræður við annan hvorn þeirra. thorbjorn@stod2.is