Hreyfihömluð kona fær ekki að keppa um tíma í Reykjavíkurmaraþoni

Arna Sigríður Albertsdóttir, ísfirsk kona sem lenti í skíðaslysi árið 2006 og hefur verið bundin við hjólastól síðan, fær ekki að keppa um tíma á Reykjavíkurmaraþoninu sem fram fer um helgina. Hún hefur æft markvisst fyrir hlaupið og ætlaði sér heilt maraþon. Þegar á hólmin er komið fær hún ekki að keppa um tíma og er stillt upp aftast í rásröð með þeim fyrirmælum að hún megi ekki taka fram úr neinum.

Arna var aðeins sextán ára gömul þegar hún hlaut varanlegan mænuskaða í skíðaslysi. Hún var á æfingaferð í Noregi þegar hún skíðaði á tré. Síðan hefur hún verið bundin við hjólastól. Að undanförnu hefur hún æft markvisst á sérhönnuðu handahjóli í því skyni að fara heilt maraþon í Reykjavíkurmaraþoni. „Þetta er auðvitað auðveldara en að hlaupa svo ég hugsa að ég gæti farið þetta á sirka tveimur og hálfum tíma," segir hún og markmiðið var að keppa um tíma.

Hjá Reykjavíkurmaraþoni kemur hún hins vegar að lokuðum dyrum. „Nei, hún fær ekki að keppa um tíma," segir Gerður Þóra Björnsdóttir, upplýsingafulltrúi Reykjavíkurmaraþons. Ástæðan er sú að um íslandsmeistaramót í hlaupi er að ræða og forsvarsmönnum hlaupsins finnst öfugsnúið að manneskja á hjóli keppi um tíma í því. Arna verður þó ekki útilokuð frá tímatökunni. Tíminn verður mældur en hún á ekki kost á því að komast á verðlaunapall.

Örnu verður þó leyft að taka þátt í hlaupinu. Hún verður hins vegar sett aftast í rásröð, en hlaupurum er raðað upp eftir því á hvaða hraða þeir hyggjast hlaupa. Henni er auk þess bannað að taka fram úr og gert að víkja fyrir hlaupurum þó hún geti að líkindum farið mun hraðar yfir en flestir hlauparar. „Það skapar hættu. Þetta er bara spurning um öryggi. Hlauparar búast ekki við því að einhver komi skyndilega fram úr þeim á hjóli," segir Gerður. Auk þess fara hjól af þessum togar hraðar yfir en hlaupararnir og aðstæður bjóða ekki upp á slíkt vegna umferðaröryggis. „Við fáum því miður ekki að loka sumum götum. Þetta væri allt annað mál ef við gætum gert það. Við viljum bara ekki hafa á samviskunni að einhver keyri á konu á hjóli hérna hjá okkur," segir Frímann Ari Ferdinandsson, framkvæmdastjóri hlaupsins.

Arna er afar svekkt yfir afstöðu Reykjavíkurmaraþons. Eins og stendur efast hún um að hún taki þátt enda ekki spennandi að vera fastur aftast í langri röð. Hún ætlar því að leita eitthvert annað eftir hlaupi sem hún getur tekið þátt í og fengið tímamælingu.