Óvenjumörgum hreindýraveiðileyfum skilað

Óvenjumörgum hreindýraveiðileyfum hefur verið skilað ónotuðum í sumar, þar sem margir hafa kolfallið á skotprófi, sem nú er krafist í fyrsta sinn.

Þá munu einnig vera dæmi um að menn hafi ekki einu sinni treyst sér í prófið. Að sögn leiðsögumanns hefur þetta þá jákvæðu hlið að það eru ekki nema hæfir veiðimenn sem nú ganga til þessara veiða. Þrátt fyrri að fjölmörögum leyfum hafi verið skilað inn, dregur ekkert úr veiðunum, þar sem þar sem margir voru á biðlista í vor og eru sumir enn. Nú er búið að fella um 200 dýr, en leyft verður að fella rétt liðlega þúsund dýr á þessu veiðitímabili, sem lýkur 20. september. En það er ekki á allra færi að stunda þessar veiðar.

Skotprófið kostar 4,500 krónur, veiðileyfi á kú 80 þúsund og 135 þúsund á tarf. Leiðsögumaður, sem veiðimenn verða að taka, kostar um 40 þúsund krónur og stundum þarf fleiri en einn dag til að ná dýri, fjórhjól, til að flytja það af blóðvellinum niður í bíl, kostar 20 til 30 þúsund krónur á dag, svo kostar allt að 35 þúsund krónur að úrbeina dýrið og koma kjötinu í neytendapakkningar, og svo hleypur flutningskostnaður á kjötinu til höfuðborgarsvæðisins á nokkrum þúsundum. Auk þessa er hreindýratúr austur, frá höfuðborgarsvæðinu, vart styttri en þrír sólarhringar, með viðeigandi eldsneytis- og gistikostnaði. Talið er að einn svona túr eftir einu dýri, kosti að minnstakosti 300 þúsund krónur, þegar allt er talið.-