Sjálfstæðisflokkurinn vill gera vínveitingar mögulegar

Borgarfulltrúar Sjálfstæðisflokks lögðu til á borgarráðsfundi að reglum um vínveitingaleyfi verði breytt þannig að þær komi ekki í veg fyrir að dvalarheimili aldraðra geti fengið leyfi til að selja áfengi. Tillögunni var frestað á fundinum.

Júlíus Vífill Ingvarsson, borgarfulltrúi Sjálfstæðisflokks, segir að auðvelt sé að breyta málsmeðferðarreglunum og það taki engan tíma. „Hvort dvalarheimili nýta sér það að mega veita vín er svo auðvitað þeirra mál," segir hann.

Málsmeðferðarreglur borgarráðs um veitinga- og gististaði koma í veg fyrir vínveitingu á dvalarheimilum aldraðra. Með því að breyta 5. gr. reglnanna má auðveldlega rýmka reglurnar.