Tímavélin Reykjavík Walk opnar í Iðuhúsinu á morgun

Margmiðlunarsýningin Reykjavík Walk verður opnuð í Iðuhúsinu í Lækjargötu á Menningarnótt á morgun. Sýningin veitir einstaka innsýn í Reykjavík fyrri tíma þar sem áhorfendur upplifa gamla tíma í bland við nýja.

„Áhorfendur setjast inn í klefa með hreyfanlegum sætabúnaði. Leiknu efni, þrívíddarteikningum og ljósmyndum er blandað saman til þess að endurskapa ásýnd Austurstrætis frá árinu 1912 til dagsins í dag. Farið er yfir sögulega viðburði og er einstaklega skemmtilegt að upplifa hvernig miðborgin og aðbúnaður borgarbúa hafa þróast á ekki lengri tíma en einni öld," segir í tilkynningu.

Sýningin skartar einnig ísvegg, þokufossi og norðurljósahelli þar sem unnt er að gleyma stað og stund undir tónlist Ben Frost. Einnig eru þar fágætar ljósmyndir af Reykjavíkurborg og er gestum boðið upp á myndatöku í víkingabúningum með vopnum og öllu tilheyrandi.

Sýningin verður opin milli klukkan 10 og 21 á morgun. Aðgangseyrir er 1000 krónur en börn og eldri borgarar fá frítt inn.