Um fimmtíu þúsund manns í miðbænum

Um fimmtíu þúsund manns eru komnir niður í miðbæ Reykjavíkur að sögn lögreglumannsins Ágústs Svanssonar, sem sér meðal annars um samhæfingu aðgerða lögreglu og björgunarsveita.

Að sögn Ágústs hafa hátíðarhöldin verið til fyrirmyndar en þó hefur borið nokkuð á því að ökumenn aki götur sem eru lokaðar. Slíkt veldur mikilli hættu og hvetur Ágúst ökumenn til þess að virða lokanir lögreglu.

Í kvöld tekur svo við eftirlit með unglingadrykkju til þess að sporna við ómenningu að sögn Ágústs. Þannig verður sérstaklega fylgst með drykkju ungmenna og áfengi verður tekið af þeim sjáist ungmenni undir aldri neyta slíkra drykkja.