Mikið um sjúkraflutninga - slökkvilið ánægt með Menningarnótt

Mikið hefur verið um sjúkraflutninga hjá slökkviliðinu á höfuðborgarsvæðinu um helgina. Menningarnótt tókst þó vel til að mati slökkviliðsmanna en þar gerði muninn að sjúkraflutningamenn voru á litlum vélhjólum í miðbænum og gátu þannig komist auðveldlega á milli í mannhafinu.

Nóttin var þó lítið í ætt við menningu að mati slökkviliðsmanna en níu líkamsárásir voru tilkynntar til lögreglu. Eitt fórnarlamb þurfti að flytja meðvitundarlaust á sjúkrahús. Það var því í nógu að snúast um nóttina hjá sjúkraflutningamönnum.

Þá var nokkur erill hjá björgunarsveitum landsins og Landhelgisgæslunni í gærkvöldi. Þannig var þyrla gæslunnar send á Höfn þar sem leitað var að konu sem hafði fallið við Geitafell á Hoffelsjökli. Konan, sem er frönsk, náði að hringja í neyðarlínuna úr farsíma og láta vita af sér. Leitin var þó nokkuð snúin þar sem konan vissi ekki hvar hún var stödd.

Að lokum tókst björgunarmönnum að finna staðsetningu konunnar, en erfitt var að komast að henni. Það tók klukkustund að bjarga konunni og var hún því næst flutt með þyrlu á sjúkrahús í Reykjavík. Hún reyndist vera meidd á höfði.