Guðmundur: Ólafur er einn besti handboltamaður sögunnar

„Ég er verulega sorgmæddur. Við hefðum getað farið alla leið og vorum svo nálægt því. Þetta eru erfiðar tilfinningar," sagði Guðmundur Guðmundsson við Vísi eftir að hafa stýrt sínum síðasta leik með íslenska landsliðinu.

Guðmundur gaf út fyrir Ólympíuleikana að hann myndi ekki halda áfram þjálfun landsliðsins til að einbeita sér að starfi sínu hjá þýska úrvalsdeildarfélaginu Rhein-Neckar Löwen.

Í dag tapaði Ísland fyrir Ungverjalandi í fjórðungsúrslitum handboltakeppninnar á Ólympíuleikunum og féll þar með úr leik. Tvíframlengja þurfti leikinn en á endanum fögnuðu Ungverjar sigri.

„Þetta gat endað á hvorn veginn sem var og þetta var ótrúlegur leikur. Við spiluðum á köflum frábæran handbolta. En hann var köflóttur hjá báðum liðum sem er eðlilegt miðað við að þetta var sjötti leikurinn á tólf dögum."

„Við fengum tækifæri til að klára leikinn en því miður tókst það ekki. Svo var tvíframlengt og verður leikurinn nánast eins og happdrætti."

„Ungverjar spiluðu góðan varnarleik og markvarslan var góð. Þeir eru með frábært lið sem var erfitt að eiga við."

Ólafur Stefánsson lék í dag mögulega sinn síðasta landsleik þó svo að hann hafi ekki gefið út neitt um sitt framhald.

„Sá tími sem ég hef fengið með Óla hefur verið stórkostlegur. Hann er einn af bestu handboltamönnum sögunnar. Hann er frábær karakter, leiðtogi og fyrirmynd. Það hefur verið einstakt að vinna með honum eins öllum öðrum leikmönnum."

„Ég veit ekkert um hvað hann gerir næst en ef það reynist rétt að hann muni hætta þá verður mikil erftirsjá að honum - bæði sem leikmanni og karakter."