Ólafur: Ég verð að lifa með þessu

Ólafur Stefánsson átti skiljanlega mjög erfitt með sig í viðtali við blaðamann Vísis eftir tapleikinn gegn Ungverjum í dag.

Strákarnir okkar eru úr leik á Ólympíuleikunum í London eftir tap fyrir Ungverjum í tvíframlengdum leik. Ólafur, sem er nýorðinn 39 ára gamall, hafði gefið allt sitt í Ólympíuleikana.

„Þetta er mikill harmleikur. Ég var þess fyrir utan ekki góður mestallan leikinn," sagði hann.

„Ég veit ekkert hvað ég á að gera núna. Ég er bara búnn að vera að hugsa um að vakna og sofa síðasta eina og hálfa árið til að koma mér í form fyrir þessa leika."

„Svo spila ég 80 prósent undir getu í leiknum sem skiptir öllu máli. Hver ástæðan er fyrir því skiptir ekki máli. Þetta er bara eitthvað sem ég verð að lifa með."