Conte telur að 60% íþróttamanna á ÓL noti ólögleg lyf

Victor Conte, sem á sínum tíma var sakfelldur fyrir að aðstoða íþróttamenn við að nota ólögleg lyf, segir í viðtali við breska dagblaðið The Times að allt að 60% af keppendum á ÓL noti ólögleg lyf til þess að bæta árangur sinn. Conte er eigandi lyfjafyrirtækisins Balco, en hann tengist lyfjamisnotkun íþróttamanna á borð við Dwain Chambers sem var úrskurðaður í tveggja ára keppnisbann árið 2003 vegna notkunar á THG hormóninu.

Conte segir að það Alþjóðaæolympíunefndin hafi beitt áróðri þegar því var haldið fram að leikarnir í London yrðu þeir „hreinustu" í sögunni. „Það er í mínum huga áróður að halda þessu fram, það hefði þurft að gera öll þessi próf fyrir 9 mánuðum en ekki rétt fyrir eða á meðan leikunum stendur," sagði Conte m.a. í viðtalinu en hann fékk fjögurra mánaða fangelsisdóm árið 2005 vegna aðkomu sinnar að stórum lyfjamálum og að auki var hann í fjögur ár í stofufangelsi.