Sjálfboðaliðar reisa íþróttahöll í Hveragerði

Fjöldi sjálfboðaliða kom saman í Hveragerði í gær og hjálpaði til við að reisa nýja íþróttahöll fyrir bæinn. Mæting sjálfboðaliða var framar vonum og telur Aldís Hafsteinsdóttir, bæjarstjóri, að rúmlega 50 manns hafi lagt hönd á plóg. Að sögn ríkti gleði og fjör í hópnum.

Í gær var annar dagurinn af þremur sem sjálfboðaliðar mæta til að vinna að Hamarshöllinni í Hveragerði. Verkefnið í gær fólst í því að draga út hallardúkinn og koma honum á rétta staði, en hann er níðþungur og því þarf fjölmenni til færa hann úr stað. Síðasti dagur sjálfboðavinnunnar verður í dag.

Að sögn Aldísar var einstök sjón að verða vitni að því þegar tugir einstaklinga röðuðu sér á kantinn og hlupu með dúkinn yfir völlinn. Þeir erlendu aðilar sem hafa umsjón með verkinu hafa sjaldan ef nokkurn tíma orðið vitni að viðlíka viðbrögðum hjá bæjarbúum þar sem svona hús hafa verið sett upp. Aldís segir að Hvergerðingar geti verið stoltir af hópnum sínum.

Stefnan er sú að vinna við húsið klárist um helgina þegar höllin verður blásin upp. Um er að ræða loftborið íþróttahús og segir á vefsvæði Hveragerðis að það verði eitt glæsilegasta íþróttasvæði landsins. Aldís telur að það verði mikið sjónarspil þegar húsið verður blásið upp.

Aðspurð um hvers vegna sjálfboðaliðar eru fengnir til að vinna við húsið segir Aldís ekkert launungarmál að fjármunir sparist með þessum hætti. Það sé hins vegar ekki eina ástæðan „Í svona litlum plássum myndast ákveðin samstaða meðal íbúanna. Þessi íþróttahöll er flottari en við eigum að venjast hér. Fólk hlakkar mikið til að sjá þetta verða að veruleika. Fólk langar að taka þátt í þessu, eiga einhvern smáhluta af byggingunni. Svo er bara gaman þegar fólk í dag getur sameinast um eitthvað."

Höllin verður 5140 fermetrar með 15 metra lofthæð. Þar inni verður hálfur fótboltavöllur og löggildur handboltavöllur. Því er hér ekki um neina smásmíð að ræða.