Barnaníðingurinn hefur ekki komið inn á fósturheimilið í tvö ár

„Við höfum kallað eftir upplýsingum frá fósturheimilinu og barnaverndarnefndum sem eiga hlut að máli, en eftir því sem við best vitum hefur maðurinn ekki komið þangað eftir sumarið 2010," segir Heiða Björg Pálmadóttir, lögfræðingur Barnaverndarstofu, um stöðu fósturheimilisins sem dæmdur barnaníðingur heimsótti í fyrrasumar.

Maðurinn er bróðir fósturföðurins sem hleypti manninum inn á heimilið en níðingurinn var dæmdur árið 1997 fyrir að misnota sex barnungar stúlkur. Þá hlaut hann fjögurra ára fangelsi, sem var þyngsti dómurinn sem þá hafði fallið fyrir kynferðislega misnotkun á börnum.

Samtök vistheimilabarna gagnrýna fósturforeldrana harðlega fyrir dómgreindarleysi í ályktun sem samtökin sendu frá sér í dag. Þá fordæma samtökin einnig eftirlitsleysi barnaverndaryfirvaldanna á þessu fósturheimili og krefjast þess að slík vistheimili verði undir smásjá héðan í frá.

Heiða Björk segir að það hafi komið í ljós sumarið 2010 að maðurinn var á heimilinu. Um haustið var haft samband við fósturforeldrana og þeim tilmælum beint til þeirra að maðurinn kæmi ekki aftur inn á heimilið. Við þeim tilmælum var orðið að sögn Heiðu Bjarkar.

Um eftirlitið segir Heiða Björk að tvær eftirlitsstofnanir skoða heimilið reglulega auk þess sem skólayfirvöld vinni með barnaverndarnefndum þegar um fósturbörn er að ræða. Aðspurð hvort það sé ekki ráð að fjarlægja barn af fósturheimili, komi í ljós að fósturforeldrar hafi sýnt af sér slíkt dómgreindarleysi, svarar Heiða því til að það þurfi afar ríkar ástæður til þess að fjarlægja fósturbarn af heimili, enda afar íþyngjandi fyrir þau.

Hún segir málið til skoðunar.

Aðspurð hvort það sé rætt við börnin sem áttu samskipti við manninn, og þau spurð úti samskiptin, svara Heiða því að hún vit ekki betur en svo að það hafi verið rætt við alla þá sem komu að málinu. En hún getur ekki tjáð sig um einstök tilfelli.