Börnin fá gefins banana á meðan foreldrarnir kaupa í matinn

Yngstu viðskiptavinir Hagkaups geta nú fengið gefins banana á meðan foreldrar eða forráðamenn þeirra kaupa í matinn. Börnunum líður betur í verslunarferðinni og gera má ráð fyrir að sælgætisþörfin minnki segir innkaupastjóri.

Matvöruverslanir hér á landi hafa á síðustu vikum lagt sitt að mörkum til að bæta heilsu landsmanna. Eigendur Víðis fjarlægðu til að mynda sælgætisbarina úr verslunum sínum og ekkert nammi er að sjá þar hjá búðarkössunum. Þá hafa Krónan, Hagkaup, Bónus og Nammibarinn á Laugavegi komið upp ráðleggingum um hæfilega skammta á sælgæti við sína bari. Hagkaup hóf svo fyrir nokkrum dögum að gefa börnum, 9 ára og yngri, banana sem þau geta neytt á meðan þeir fullorðnu versla.

„Hver kannast ekki við að vera með svangt barn inni í búð og þá er upplagt að geta fengið eitthvað hollt og gott," segir Sigríður Gröndal innkaupastjóri Hagkaups og bætir við að viðskiptavinir hafi tekið verkefninu vel.

„Það er vitundarvakning fyrir hollu mataræði og gríðarlega margir sem eru ánægðir með að barnið fái banana á meðan það er inni í búðinni og krökkunum líður þá betur."

Og sækja þá kannski síður í sælgætið? „Já það má alveg reikna með því," segir hún.

Verkefnið stendur yfir í júní og júlí en búist er við að önnur svipuð líti dagsins ljós í Hagkaupsverslunum í sumar.