Meintum barnaníðingi sleppt úr gæsluvarðhaldi

Karlmaður, sem hefur verið ákærður fyrir að misnota ellefu ára dóttur sína, hefur verið sleppt úr gæsluvarðhaldi. Hæstiréttur Íslands staðfesti í dag úrskurð Héraðsdóms Vesturlands sem hafnaði því að maðurinn yrði áfram í gæsluvarðhaldi, en hann hefur setið inni síðan hann var handtekinn grunaður um verknaðinn í byrjun desember á síðasta ári.

Ástæðan fyrir því að það var ekki fallist á gæsluvarðhaldið er sú að Hæstiréttur Íslands ómerkti dóm Héraðsdóms Vesturlands á dögunum, en áður hafði maðurinn verið dæmdur í fjögurra ára fangelsi. Ástæðan var meðal annars myndbandsupptaka af dóttur mannsins, sem fram kom í miðjum réttarhöldunum yfir honum, þar sem hún sagði að hún hefði verið í mönunarleik með vinkonum sínum og sagt þeim frá kynferðislegri misnotkun sem faðir hennar átti að hafa beitt hana. Stúlkurnar létu skólayfirvöld vita og í kjölfarið var maðurinn handtekinn.

Dómarar Héraðsdóms Vesturlands tóku ekki mið af framburði stúlkunnar á myndbandinu og dæmdu hann. Hæstiréttur telur að það þurfi að rétta aftur í málinu.

Maðurinn er ákærður fyrir að hafa haft munnmök við dóttur sína margsinnis og að hafa reynt að hafa við hana endaþarmsmök.