Þurfa að gangast undir ítarlega leit fyrir framan eftirlitsmyndavél

Allir starfsmenn íþróttavöruverslunarinnar Sports Direct þurfa að gangast undir ítarlega leit fyrir framan eftirlitsmyndavél þegar þeir yfirgefa vinnustaðinn. Kvartað hefur verið til VR vegna fyrirkomulagsins. Framkvæmdarstjórinn segir sömu reglur gilda í öllum verslunum keðjunnar.

Leitin er gerð fyrir framan eftirlitsmyndavél við anddyrið þar sem viðskiptavinir eru á ferðinni. Starfsmaður sem er á leið út úr versluninni þarf að afhenta yfirmanni yfirhöfn sína sem gengur úr skugga um að engin vara sé þar falin án þess þó að fara í vasana. Ef starfsmaðurinn er með tösku skal hún opnuð og sá sem sér um leitina lítur þar ofan í auk þess sem starfsmaður þarf að sýna að ekkert sé falið í hálsmáli og bolur skal dreginn upp svo sjáist í buxnastreng.

Þá þarf starfsmaðurinn að lyfta upp buxnaskálmum svo sjáist í sokka en ætlast er til þess að starfsmenn séu í hvítum sokkum svo auðveldara sé að sjá í gegnum þá.

Í samtali við fréttastofu sagðist starfsmanni Sports Direct líða líkt og glæpamanni vegna fyrirkomulagsins en kvartað hefur verið til VR vegna þessa og er lögmaður félagsins með málið í skoðun. Persónuvernd hefur þó ekki fengið kvörtun inn á borð til sín og getur ekki lagt mat á lögmæti fyrirkomulagsins án þess að skoða málið nánar.

Framkvæmdastjóri Sports Direct hér á landi segist ekki hafa fengið kvörtun frá starfsmönnum en tekur fram að þeim hafi eflaust fundist fyrirkomulagið skrýtið til að byrja með. Allar verslanir keðjunnar bresku, sem eru um fimmhundruð talsins, fylgi sömu öryggisreglum en þær eru tilkomnar vegna þess hve hátt hlutfall af allri rýrnum er starfsmannatengdur.