Bjarni segir ýmislegt óeðlilegt á Alþingi

Bjarni Benediktsson, formaður Sjálfstæðisflokksins sagði í morgun að margt væri óvanalegt og óeðlilegt á Alþingi í dag.

Til dæmis að þingið væri enn að störfum tveimur vikum eftir síðasta dag samkvæmt starfsáætlun. Sömuleiðis að tvö mikilvæg mál ríkisstjórnarinnar væru enn í nefnd, þ.e. frumvarp um stjórn fiskveiða og rammaáætlun um náttúruvernd.

Þá segir hann einnig óvenjulegt að ríkisstjórnin vilji sundra þjóðinni en ekki sameina hana, og nefnir í því samhengi ESB-málið og icesave.

Birgir Ármansson, þingmaður Sjálfstæðisflokksins sagði að það væri ekki rétt lýsing að minnihlutinn kæmi í veg fyrir að öll mál væru afgreidd í þinginu. „Það vill til að 56 mál hafa verið kláruð hér í þinginu á síðustu vikum," sagði hann. „Þegar hæstvirt ríkisstjórn hefur keyrt jafnrækilega út af veginum og raun ber vitni þýðir ekkert að standa úti í skurði og öskra að þetta sé ekki henni að kenna. Það sem máli skiptir er að reyna að komast upp úr skurðinum," sagði hann að lokum.

Rætt var um störf þingsins á Alþingi í morgun.