Engar áhyggjur af samdrætti í fataverslun

Svava Johansen, eigandi tískukeðjunnar NTC, hefur ekki áhyggjur af samdrætti í fataverslun. Hún hefur fundið fyrir svipuðum samdrætti áður þegar fluggjöld til útlanda lækka og kaupþyrstir Íslendingar hrannast til útlanda í verslunarferðir. „Þetta setur bara pressu á okkur kaupmenn að standa okkur enn betur," segir Svava.

Rannsóknarsetur verslunarinnar birti í síðustu viku tölur sem sýna að heildarverslun með föt hefur dregist nokkuð saman frá hruni og meðan annars konar smávöruverslun er að rétta úr kútnum heldur fataverslunin áfram að dragast saman.

„Við erum náttúrlega með mismunandi verslanir og sala í sumum verslunum eykst en dregst saman í öðrum," segir Svava. Þó heildartölur sýni að fataverslun hafi dregist saman er það afar misjafnt eftir aðilum og Svava telur að margir kaupmenn geti verið mjög ánægðir með sölu síðustu ára. Hún segist jafnframt finna fyrir mikilli aukningu í miðbænum og rekur það til aukins ferðamannastreymis.

Að mati Svövu dróst fataverslun ekki saman strax eftir hrun. Það var í raun mikið að gera. Útlendingar flykktustu til landsins og keyptu föt á hagstæðu gengi fyrir svimandi fjárhæðir. Þá jókst sala á dýrum fötum mjög. Uppúr árinu 2010 fór verslunin að hökta. Þá voru Íslendingar byrjaðir að ferðast meira erlendis. „Þá fundum við fyrir því að Íslendingar hættu að versla hérlendis," segir Svava og bendir sömuleiðis á að sala á netinu hafi aukist.