Búið að skattleggja fataverslun úr landi

Íslensk fataverslun er illa samkeppnishæf við nágrannalöndin vegna skattlagningar segir Finnur Árnason, forstjóri Haga. Hér á landi eru tollar lagðir á vörur auk þess sem virðisaukaskattsstigið er 25,5%.

„Við erum að keppa við Bretland, þar er enginn virðisaukaskattur á barnafatnað. Á Norðurlöndum fær fólk virðisaukaskattinn endurgreiddan (tax free). Í Bandaríkjunum er 6-8% söluskattur," segir Finnur.

Þetta telur Finnur helstu ástæðuna fyrir því að fatasala hefur stöðugt dregist saman frá hruni. Nú síðast kom fram í Morgunkorni Íslandsbanka að fatasala dróst saman um 5% í maí miðað við sama tíma í fyrra og um 13% í apríl.

„Það er tvennt í þessu. Annars vegar skattlagningin og hins vegar hafa ráðstöfunartekjur heimilanna dregist saman," segir Finnur. „Þess vegna leyfir fólk sér minna."

Tvöfaldur tollur

Finnur bendir auk þess á að Íslendingar greiði tvöfaldan toll af vörum sem framleiddar eru utan Evrópusambandsins.

Íslenskir söluaðilar kaupa mikinn varning frá Danmörku, Bretlandi eða Hollandi eða Evrópusambandslöndum. Almennur tollur inn í Evrópusambandið er 15% og því er þegar búið að leggja á vöruna þegar Íslendingar kaupa hana. Hún er svo flutt til landsins og aftur greiddur tollur af henni. Ofan á það er að lokum lagður 25,5% virðisaukaskattur.

Hagar reka meðal annars Hagkaup, Zara, Karen Millen, Topshop, Útilíf og Debenhams.