Hefur hótað lögmanninum áður

Tveir menn réðust inn á lögmannsskrifstofu við Lækjartorg í dag og veittust að eiganda hennar. Ofbeldismennirnir höfðu áður haft í hótunum við starfsfólkið.

Það var um hálf þrjú leytið sem að mennirnir komu á skrifstofuna og veittust að starfsfólki.

Þeir réðust síðan á lögfræðing en hann slapp að mestu ómeiddur. Þeir gengu svo um og brutu og brömluðu það sem á vegi þeirra varð.

Mennirnir náðu að flýja af vettvangi áður en lögreglan kom á staðinn. Hún veit hins vegar hverjir voru að verki.

Ástæða árásarinnar tengist málarekstri annars ársarsmannsins, en hann var ekki sáttur við hvernig honum lauk. Hann hafði áður haft í hótunum við lögmanninn, sent honum smáskilaboð og varað hann við hverju hann gæti átt von á.

Lögregla leitar nú árásarmannanna.