Hrottafengnar árásir Annþórs og Barkar

Árásir Annþórs Kristjáns Karlssonar og Barkar Birgissonar á sjö manns voru skipulagðar og sérstaklega ófyrirleitnar að því er fram kemur í ákærunni á hendur þeim. Málið verður þingfest á föstudag, að því er fréttavefur RÚV greinir frá. Alls eru tíu manns ákærðir

Í einni árásinni fóru þeir Annþór og Börkur vopnaðir á heimili manns á höfuðborgarsvæðinu. Maðurinn opnaði fyrir þeim en þrír til viðbótar voru á heimilinu. Samkvæmt ákærunni sendi Annþór svo skilaboð til sjö manna, sem biðu fyrir utan. Annþór hleypti þeim inn og réðist hópurinn á fólkið með golfkylfum, handlóðum, prikum og öðrum bareflum þannig að einn hlaut, auk annarra áverka, opið beinbrot, annar handleggsbrotnaði og hinir tveir hlutu höfuðáverka.

Neyddu mann til að pissa á félaga sinn

Í annarri árás er Berki og Annþóri gefið að sök að hafa skipulagt árás á þrjá menn í heimahúsi. Þá fóru þeir vopnaðir, ásamt fleiri mönnum, og réðust á þá sem í íbúðinni voru, börðu þá í hnakka og líkama og kröfðust þess að þeir greiddu sér hálfa milljón króna. Þá neyddu þeir einn mannanna til að kasta af sér þvagi yfir annan á meðan Annþór hélt honum niðri. Eru Annþór og Börkur ákærðir fyrir árásina sem og frelsissviptingu og tilraun til fjárkúgunar. Tveir til viðbótar eru ákærðir fyrir aðild að árásinni en aðrir sem tóku þátt í henni eru óþekktir.

Annþór réðst á mann heima hjá sér

Að auki eru tveir menn ákærðir fyrir að hafa farið með tvo menn, sem þeir töldu sig eiga sökótt við, til Annþórs, sem veittist að þeim með höggum og spörkum í andlit og líkama. Þá tók hann annan manninn kverkataki þannig að hann missti meðvitund og féll í gólfið. Annþór krafðist þess að þeir létu hann fá peninga og hótaði því að ef þeir segðu frá árásinni færu þeir í áskrift hjá honum sem væri ævilöng skuld við hann.

Annþór og Börkur voru báðir á reynslulausn þegar þeir réðust á mennina. Þeir voru umsvifalaust fangelsaðir eftir þær. Nú hafa þeir verið settir í einangrun, grunaðir um að hafa orðið manni að bana á Litla - Hrauni.