Ekki þorandi að flytja Börk í dóminn - úrskurðað um varðhald í fangelsinu

Kveða átti upp gæsluvarðhaldsúrskurð yfir Annþóri Kristjáni Karlssyni og Berki Birgisson í Héraðsdómi Suðurlands klukkan ellefu í morgun. Samkvæmt upplýsingum fréttastofu var það ekki gert í dómnum heldur kom dómari á Litla Hraun og kvað upp úrskurð þar. Þeir voru úrskurðaðir í gæsluvarðhald til 13. júní næstkomandi.

Í gær var farið fram á gæsluvarðhald yfir tvímenningunum í Héraðsdómi Suðurlands en dómari tók sér þá frest þar til í morgun til að kveða upp úrskurð. Í gær voru þeir fluttir í dóminn og samkvæmt heimildum fréttastofu lentu lögreglumenn í vandræðum með Börk Birgisson sem sýndi ofbeldistilburði og hafði í hótunum.

Afar fátítt, ef ekki einsdæmi, er að úrskurðir séu ekki kveðnir upp í dómsal.

Annþór og Börkur eru grunaðir um að hafa orðið samfanga sínum að bana. Þeir voru að afplána eftirstöðvar eldri dóma þegar maðurinn lést. Sýslumaður fer fram á gæsluvarðhald yfir þeim til að hægt sé að halda þeim lengur í einangrun.