Rán og ölvaðir ökumenn í höfuðborginni í nótt

Þrír menn veittust að öðrum manni á Klambratúni klukkan hálf fjögur í nótt og rændu. Mennirnir voru vopnaðir hnífum. Þeir náði lítilræði af peningum og voru farnir á brott þegar lögregla kom á staðinn.

Klukkan hálf tvö í nótt var tilkynnt um bifreið utan vegar á Álftanesi. Tveir ölvaðir menn voru við bílinn og voru þeir ekki með það á hreinu hvor þeirra hefði verið undir stýri þegar ekið var út í móa. Samkvæmt upplýsingum frá lögreglu skýrðist málið þó fljótlega.

Þá fengu 23 aðilar sekt í miðborginni fyrir brot á lögreglusamþykkt. Voru þetta aðilar sem köstuðu frá sér rusli og þvagi. Sektin fyrir þessi brot er 10 þúsund krónur.

Þrjár líkamsárásir voru tilkynntar til lögreglu í nótt. Þær áttu það sameiginlegt að þær voru allar við skemmtistaði. Voru þær ýmis að dyraverðir tilkynntu um árás á sig eða tilkynnt var um árás af hálfu dyravarða.

Um 90 atvik voru bókuð hjá lögreglunni á höfuðborgarvæðinu í nótt.