Segir ummæli sín um forsetaembættið ekki kynjuð

Ólafur Ragnar Grímsson, forseti Íslands, birti í dag pistil á Fésbókar-síðu sinni þar sem hann gagnrýnir skrif Rósu Guðrúnar Erlingsdóttur, stjórnmálafræðings.

Rósa birti grein á Vísi fyrr í vikunni þar sem hún fór hörðum orðum um orðaval og ummæli forsetans á síðustu dögum og vikum.

Þar á meðal sakaði hún Ólaf um kynjaáróður í garð meðframbjóðanda síns, Þóru Arnórsdóttur, en hann lét þau ummæli falla í viðtali að forsetinn ætti ekki að vera „skrautdúkka" og að kosningarnar snérust ekki um að velja veislustjóra á Bessastaði.

Rósa telur að Ólafur hafi hér vísað til Þóru, helsta áskoranda síns.

Ólafur segir að allar dylgjur um að ummæli sín um forsetaembættið séu kynjuð vera sérkennilegan málflutning.

„Ég hef verið sakaður um margt á langri leið en aldrei fyrr um að gera lítið úr konum," skrifar Ólafur.

Þá segist hann hafa tekið virkan þátt í jafnréttisbaráttunni og að hann hafi átt fjölda áhrifaríkra kvenna að samherjum og samstarfsmönnum.

Hægt er að lesa pistil Ólafs í heild sinni hér fyrir neðan, einnig er hægt að nálgast Fésbókar-síðu Ólafs hér. Þá er hægt að nálgast grein Rósu hér.

Um konur.

Rósa Guðrún Erlingsdóttir, ræðumaður á fundi Kvennahreyfingar Samfylkingarinnar, skrifar á Vísir.is pistil þar sem hún dylgjar um að umfjöllun mín um forsetaembættið sé kynjuð og að ég sé að gera lítið úr Þóru sem konu. Þetta er sérkennilegur málflutningur. Ég hef þvert á móti sýnt Þóru Arnórsdóttur virðingu með því að ræða á málefnalegum grundvelli þau sjónarmið sem hún hefur sett fram um forsetaembættið. Það er í anda jafnréttis og hvatningar minnar um að umræðan sé málefnaleg og kurteis.

Ég hef verið sakaður um margt á langri leið en aldrei fyrr um að gera lítið úr konum. Eftir að hafa í áratugi tekið virkan þátt í jafnréttisbaráttunni og átt þar fjölda áhrifaríkra kvenna að samherjum og samstarfsmönnum er svona sending vissulega ný reynsla!

Engir hafa átt jafn ríkan þátt í að móta viðhorf mín og skoðanir en hópur sjálfstæðra og sterkra kvenna: Guðrún Katrín, Tinna, Dalla, Dorrit og fleiri úr fjölskyldunni.