Tillögur að breyttum kvótafrumvörpum kynntar

Breytingartillögur við kvótafrumvörp ríkisstjórnarinnar verða kynntar á fundi atvinnuveganefndar nú rétt eftir hádegið. Forseti Alþingis ræðir í dag við formenn þingflokkanna um möguleg þinglok, og í kvöld eru eldhúsdagsumræður.

Fundur hefst í atvinnuveganefnd klukkan eitt þar sem á dagskrá eru frumvörp um stjórn fiskveiða og um veiðigjöld. Kristján Möller, formaður nefndarinnar, kynnir í dag breytingatillögur við frumvörpin en hann vill ekki gefa upp fyrirfram hverjar þær eru. Vonast er til að nefndin afgreiði frumvörpin til annarrar umræðu í þinginu fyrir vikulok.

Þá hefjast eldhúsdagsumræður á Alþingi rétt fyrir átta í kvöld, en þær eru jafnan haldnar þegar stutt er í þinglok.

Ekki hefur hins vegar náðst samkomulag um lok þings þetta vorið. Ásta Ragnheiður Jóhannesdóttir, forseti Alþingis, segir í samtali við fréttastofu í morgun að hún stefni á að eiga óformlega fundi með þingflokksformönnum í dag, hverjum fyrir sig, til að kanna samkomulagsgrundvöll fyrir þinglokum.

Samkvæmt starfsáætlun Alþingis átti að ljúka vorþingi 31. maí en afar ólíklegt er að það gangi upp.

Ásta segir ekki ljóst enn hvenær þinginu lýkur, enda sé það komið undir því að samkomulag náist um þinglokin.