Elsti sonur Warrens Buffet vill rækta maís á Íslandi

Howard Buffet, elsti sonur Warren Buffet eins ríkasta manns í heimi, kannar nú möguleikann á maísrækt hér á landi. Ef það gengur eftir hefur hann áhuga á að kaupa hér land og hefja jarðrækt Howard er stofnandi Howard G. Buffet góðgerðarsjóðsins sem vinnur að mannúðarmálum víða um heim og hefur meðal annars þau markmið að efla ræktun og matvælaframleiðslu þar sem fátækt er mikil.

Hann kom hingað til lands í síðustu viku ásamt tveggja manna föruneyti en það er Bændablaðið sem greinir frá þessu. Það var doktor Ólafur R. Dýrmundsson, landnýtingarráðunautur Bændasamtaka Íslands sem hitti Howard og fylgarfólk hans á fimmtudaginn í síðustu viku, grunlaus um hvaða fyrirmenni þarna voru á ferð.

„Ég uppgötvaði það ekki fyrr en morguninn eftir. Mér fannst gott að tala við hann og ég fann að hann hafði góða þekkingu á landbúnaði og ræktun," segir Ólafur. Howard var hér á landi til að kynna sér landbúnað og möguleika í jarðrækt og hvaða áhrif loftslagsbreytingarnar munu hafa á norðurslóðum.

„Hann vék aðeins að ræktun hér á landi, möguleikum á því og var að spyrja mig um landið hérna. Talaði mikið um jarðveginn og ég fann að hann hafði mjög góða þekkingu á þessu öllu. Hann sagðist hafa áhuga á maísrækt hér en það væri erfitt, maís hefði aðeins verið prófaður hérna en það væri eiginlega of kalt, sumarhitinn væri ekki mikill," segir Ólafur.

„Hann vildi semsagt fara í það núna að kanna hvort að það væru til einhver afbrigði, annað hvort frá Norður Evrópu eða Ameríku, sem væri hugsanlega hægt að prófa. Ég spurði hann þá að því hvort að hann væri þá ða hugsa sér að taka á leigu land hérna undir þetta en þá sagðist hann frekar vilja kaupa það. Ég sagði honum að það gætu verið vissir vankantar á því en að það væri hægt að koma honum í samband við ýmsa aðila og fagmenn líka. Þannig að það sem við gerum er bara að sjá hvað gerist og ef við getum eitthvað aðstoðað þá gerum við það náttúrulega," segir doktor Ólafur R. Dýrmundsson að lokum.