Segja herbúðasnið slæmt - hafa samt meiri áhyggjur af umferðinni

„Í bókuninni er líka gefið til kynna að líkamsrækt með herbúðasniði eigi lítið erindi í dalinn og dregið fram að líkamsræktarstöð á þessum stað fylgir mikil umferð bíla og rík þörf fyrir stæði. Þetta bílakraðak er auðvitað mesta áhyggjuefnið," skrifa fulltrúar Vg í skipulagsráði Reykjavíkurgborgar, þau Torfi Hjartarson og Sóley Tómasdóttir, í grein sem birtist á Vísi í dag.

Þar útskýra þau bókun sem flokkurinn lagði fram á fundi skipulagsráðs Reykjavíkurborgar fyrir skömmu, en þar mótmæltu þau meðal annars því að líkamsræktarstöðin Boot Camp fengi aðstöðu í dalnum, en flokkurinn taldi yfirbragð líkamsræktarstöðvarinnar með full miklu herbúðasniði.

Í greininni útskýra þau á að fyrirsjáanleg aukin umferð tengdri líkamsræktarstöðinni sé verulegt áhyggjuefni. Þannig skrifa þau: „Engar upplýsingar liggja fyrir um væntanlega umferð tengda starfseminni og lélegar tengingar við almenningssamgöngur eru við svæðið."

Þau standa við gagnrýni sína á hernaðartengingu Bott Camp og skrifa: „Þessi gagnrýni okkar Vinstri grænna þarfnast varla frekari skýringa en til frekari skemmtunar fyrir þá sem hlógu sig hása að þeirri hugmynd að líkamsrækt undir merkjum Boot Camp minni á herbúðir má segja frá því að í ensk-íslenskri orðabók segir klippt og skorið að samsetta orðið boot camp merki æfingabúðir fyrir nýliða í flota eða landgönguliði Bandaríkjanna."

Hægt er að lesa greinina í heild sinni hér fyrir neðan.