Ellis og Bogut fengu nýja vinnuveitendur | leikmannaskipti í NBA

Lokað verður fyrir leikmannaskipti í NBA deildinni í körfubolta á morgun, 15. mars, og má búast við að eitthvað muni gerast á þeim markaði. Golden State og Milwaukee tóku stóra ákvörðun í nótt. Monta Ellis, einn besti leikmaður liðsins, var sendur til Milwaukee ásamt Ekpe Udoh og Kwame Brown. Í staðinn fékk liðið Andrew Bogut og Stephen Jackson.

Bogut er ástralskur miðherji en meiðslasaga hans undanfarin misseri hefur dregið úr afköstum hans á vellinum. Bogut, sem er kraftmikill og hávaxinn miðherji, er með risasamning sem tryggir honum 27 milljónir dollara í laun næstu tvö árin, sem nemur um 3,4 milljörðum kr. Bogut brákaði bein í ökkla þann 25. janúar s.l. og er óvíst hvort hann spili meira á þessu tímabili.

Skotbakvörðurinn Ellis hefur aldrei leikið betur en í vetur en hann er með 22 stig að meðaltali og 6 stoðsendingar í leik. Hann hefur verið í sex ár hjá Golden State.